( لسه شاري)
لســـــه باقـــي ع المحبـــــــه
والمـــــــــــوده والعيــــــال
لســــه شــــاري وقلبي فاتـح
للرجـــوع أوســـع مجــال
إفتكرلـــي حاجــــة حلـــــوه
وافتكرلك الجمــــــــــــــال
دالشيطان داخــــل مـابيننـــــا
بيقطّع حبــــــل الوصــال
حبــه منـــك حبــــه منــــــــي
والأمــور رح تبـأه عـــــال
دانا يامــا شقيــت عشانـــــك
وقلبــــي في الدنيا شـال
انتا نسيت لمــا إتعاهــــــدنــا
نعيش سـوا على كل حال
واللي بيننــا يبــــأه ســـــــــر
زي حصــوه في الجبال
في الحلـــــــــوه والمره نبأه
في سعاده واحتمـــــــــال
الحيـــــــــــــــاه على ده وده
في مراحل وانتقـــــــــال
يوم معانا يوم مافيــــــش
أهم حاجه راحة البـــــال
هوه مين م الدنيا واخـــــد
في قبره دهب ومـــــال
داللي بيدخـــــــــل في جنه
هوه ده اللي حظه عــال
واللي على النـــــــــار يساق
هوه ده اللي بخته مـــال
المحاكم دي متاهـــــــــــــــــة
وحِبال جَـــــــــــــرّه حِبال
والمحامي م الفلــــــــــــــوس
كل يوم عـــــايز شــــوال
اللي راح ياخــده المحــــامي
اللي اولابه العيــــــــــــــال
ياما يامابيوت بتخــــــــــرب
م العناد والقيـــــــــل وقال
صدقينــــــــي يــــــاحبيبتى
افهمي يابنت الحــــــــلال
اللي بيقولك طــــــــــــــــلاق
رأيه ده مش في اعتدال
الطلاق مش كلمــــــه سهله
دي أشد من القتــــــــال
كلمه فالته من اللســـــــــــان
بغباوه وانفعــــــــــــــــــال
الطــــــلاق ماهوش حــــــرام
لكنه أبغض الحــــــــــــلال
الطلاق عند الشيطــــــــــــان
بين زوجين أسعد منــال
تعالي ننسا عشان ولادنــــــــا
نقضي على كلمة محــــال
نفتح صفحـــــــه تاني بيضه
يشهدو عليهاالرجـــــــــال
في مابيننا ولاد في حاجــــه
لحضـــــن مليان بالآمـال
لمــــا نتفـــــرق يضيعــــــــــو
في المهـــــالك والضــــلال
همــــــــــا دول عندي وعندك
أغلى م الدهــــب والمــال
الحيــــــاه مش مؤخـــــــــــر
ولا قايمه بالعــــــــــــــزال
الحيـــــــاه رحمــــــه وموده
وللحقـوق وفـــا وامتثــال
قلتلك كل اللـــــي عنـــــدي
وربي شاهـد عااللي اتقـال
مش خضوع ولا ضعف مـنـــي
دي أصالـــــــــه واكتمـــال
م الآخر انتي عايزه ايــــــــــــه
ردي جوبي ع الســــــــؤال
حطي عقلك جوه راســـــــــــك
وانسي كلمة انفصـــــــــال
القرار اصبح في ايــــــــــــــــــدك
اوعي تختاري الشمـــــــال
(شراء)