#معروفك
معروفك حتى لو كان بسيط
هو ميه فى عز الحر راوياك
هو زى حبه رميتها فى غيط
انبتت شجر بالضل إحتواك
معروفك كنوز دهب متخبيالك
ورزق جايلك متعبى ف شِبَاك
تربة المعروف فى غاية الكرم
تطرح ورود خاليه من الاشواك
معروفك نور يمحى ظلام الذنب
معروفك سفينه فى بحر الهلاك
تحميك لايصيبك حسد ولا هم
بإحسانك بتتطهر كأنك ملاك
ونور الثواب فى قلبك وعينك
وتلاقى ابتسامة الرضا لابساك
اعمل لنفسك جيش من الاحسان
معاه ماتخاف من أى مرض فتاك
النبى قال الصدقه تشفى المريض
وتزيل هموم زى الجبال تاعباك
فعل الخير فريضه فى كل دين
إتعلم من كرم السحاب فى سماك
خليك سحابة خير لكل المحتاجين
وقول ياربى إنت الكريم فى علاك
وأنا اكرمت خلقك كرامه لخالقهم
على قد إيدى وانت تعالت يداك
إذا كان العبد من فضل ربه كريم
فما بالك ياعبد بحدود كرم مولاك
#شحاته_على_أبودِرب
