صاحب مبدأ
………..
من كتير الواحد فيها
ما إحتك بخلق و شاف
مابقيتش الناس في عينيه
جوز هند في صحن خشاف
ما بقيتش أتأثر وأبكي
علي موقف شوفته مراراً
ولا حتي بقيت بتوتر
زي الاول او أخاف
أنا شوفت بعيني بلاوي
وحاجات عملت لي ذهول
قلبي من الصدمه أداوي
إزاي والموقف غول
أفزعني صحيح في الأول
مابقيتش بجد مصدق
مع أن الوقت بيثبت
ممكن تَغِيّر المبدا
وضروري انك تتغير
ما الناس أسرع بتغير
جلدها علي حسب الموقف
د مافيش مبدأ بالجاف
ماتخدش كلامي في سكه
عُوجه وليها إحتملات
أنا صاحب مبدأ ثابت
له زند وله شنبات
بيعدي الشارع مره
خبطته عربيه ومات .
