أما السفينة قصيده للشاعر على عفيفى

أما السفينة
أما السفينة ف عادي جدا ما بتقف على حد
وإن جيت للجد
انا بعد الهجر وبعد البعد
أرحملي كتير من وأنا جمبك
ودا مش ذنبك
دا الحسنة اللي بجد لقيتها
من مجمل كوم حرمان وأوجاع
وشراع المركبة زي ما صدق
وكأن في بعدك فك ضيقتها
ربك كريم ما بيكسف ايد ليه تتمد
على قد ما كنت معاك شايف
بحر أماني وطموح بيفوق الحد
مالقيت غير منك صد في صد
وإن حس القلب في يوم ببراح
ألاقيك تبنيلي ١٠٠ سد وسد
كام ليلة ببات مبلول الخد
كام مرة القلب بحبه سقاك
ولا مرة ألقاك تاخد وترد
فإطمن جدا مش هنساك
ولا هنسى جراح سابت بصمة
إنت بديت بالجرح وحقك
زي ما دقت انا منه هتشرب
كله بحق الله وبالقسمة
وإن كان على جرحي خلاص بيلم
وإن كان الحلم اللي ما بينا
ربك له حكمة وشايف الظلم
فإنقلب السحر على الساحر وانجهض الحلم
لأجل ما يبدل ربك روحي بحب جديد
أنت تريد وانا أريد
والله يفعل ما يريد