قصيدة ” شاطرة في التمثيل ”
قولتلك ساعتها بحبك
وفرشت ليكي من الجَناين ورد
وإن الأراضي البور كانت ممكن تِخضر
لو كان رَدِك جميل شكل الورد
كان يجرى إيه لو كُنا نكمل
كان يجرى ايه لو بـ إيدينا نِسلم
ونضيف تاني للدنيا إتنين عُشاق
ليه بس بكُل سهولة تمشي وتردي فـ وشي الباب..!
فـ انا جاي بكتبلك من تاني نص جديد
بكتبلك قبل الحرب اللي جوايا ما تزيد
من يوم ما دقيت باب قلبك
كُنتِ بالنسبالك شخص غريب عنك وملوش وجود
بكتبلك والله بدموعي هذا النص
والشغف جوايا ليكي يوم بعد يوم بيزيد
بكتبلك ومعرفش ازاي لسه بقول كلمة وحشاني
يمكن عشان بداري كلمة اه فيها
وساعتها بس هيسمحلي قلبي إن مش هعاني
فـ الحقيقة مستغرب جدا من قلبي
وإزاي مقدرش ينسى ويقسى
وإزاي لسه القلب بيدق ليكي
دا انا كُنت شايفك ليا حياة
كُنت شايفك ليا طوق نجاة
فـ إزاي هتاخدي بإيدي لمركب
تساع اتنين بس من الرُكاب
وتنقليني لبر الأمان على شط البحر
فـ المركب غرقت ومكملناش
وقطعنا خلاص المشوار
كُنت ماشي ساعتها عكس التيار
وانا فـ حبك كُنت اعمي ومكمل
فـ الجرح زاد جوايا حبتين
عشان كُنت بعافر ومُصمم نِحلم
فـ كالعادة كُل شيء جوايا لسه بيحن ليكي
والبيت المرسوم فـ خيالي إتهد
انا يمكن اه متاثر بفراقك لكن مش ظاهر للكُل
وخلاص فاض بيا الكيل
فـ حبيت اقول للكُل جُملة وأولهم ” إنتي ”
انا قلبي الحزين متفتت 100حته كُنتِ السبب فيه
ومحسش بيه حد
فـ انا جاي أسرد وجعي فـ كام بيت على الورق
والورق المليان بدموعي هيتكلم
كُنت بصعب علية لما يشوفني
في رُكن أوضتي بتألم
والناس كُل اللي عليها في الآخر
هتكون بتضحك وتسقف على وجعي
وقلبي الـ عاش مليان حنين ليها بقا مجروح
فـ ازاي هكمل تاني والدموع هتملى البير من دَمعي
في ثانيه الوعود بتتبخر وبتتنسي
والحقيقه كُنتِ شاطرة جداً فيها
مثلتِي الدور عليا بكُل براعه
والجايزة في الدور المرادي مُش اوسكار
دا كان قلبي الـ حبك
وبقا كُل حته مجروحة فيه
حبيتك اه وأدمنتك
كما شخص بيدمن الهيروين
فـ إزاي في يوم من الايام قدرتي تشوفيني غريب عَنِك
وانا والله كُنت بعافر وشايلك جوه قلبي وفي نِن العين
حلو اوي ي بنتي الدور ومسبوك عليكي بالمللي
وإن مره زعلت بتعرفي ترجعي تاني الإبتسامة
بس للأسف دي علامة لبعدين
إن كُل البشر خاينين والوشوش كدابه
ما كفاية بقا حُزن وكأبه
لشخص والله كان كُل حياته ” إنتي ”
ومصابوش غير وجعِك كُل يوم في عز الليل
كام مرة قولتي بحبك كِدب
كان قلبي يسمعها ومن الفرح يشب
بقينا إتنين بعد ما كُنا روح واحده
بقينا اتنين والله وبنمشي في الشوارع غُرب
فـ انا يومياً بنزف دموع من قلبي
ومفيش حد هياخد بـ يدي
الحزن عشش في قلبي
والوجع حواليا في كُل مكان
مش بالإمكان نبقى اغراب في يوم وليلة
ويبقى الحزن عمود اساسي في حياتي المايلة
فـ الشِعر والقافية بيلعنوا كُل يوم فيكي
فـ انا وجعي بيظهر للناس فـ كُل قصيدة
فـ بالتالي والله مش مقصـودة
دول كِلمتين جوايا سردتهم من وجعي في عز الليل
ومكنوش تمثيل أبداً دول كانوا حقيقه
فـ بكُل بساطه
كُنت فاتح قلبي ليكي
وحبيتك وادمنتك
كُنت ساعتها طفل بريء فـ اللفه
ومش غلطان ولا ندمان
الدنيا بتعلم ياما والفضل يرجعلك
خلتيني اشوف الدنيا بعيون واضحه
وعرفت إن الكُل بيعرف يمثل فيها شَكلِك
وإنك كمان في الكدب شيء بارع جداً
مريضه والله ومحتاجه لدكتور نفساني
بس أرجع م الاول واقول
إنك فـ التمثيل والله شيء تاني