للمره الالف انا كنت فى وجعك كتف بكتف
من غير ماستنى جزاء منك ولا شكر بحرف
ومكنتش مستنى ترد ال عملته معاك
انا ظنى انى بزود فى رصيد جواك
انا كنت بحاول اتناسى انك صاحب زور
ويحارب فى ظلامك بالنور
بتحايل على فكرتى عنك وبلف وادور
والواضح جدا انك زى الارض البور كل ده مقبول
وانا كنت متعايش وياه
صاحبك على عيبه والعيب انى مقفش معاه
بس خيالى لو كان اوسع م السما والارض
عمر مكان يجى فى بالى ان هيبقى الرد
خيانه وغدر واصابه كبيره فى عمق القلب
طب كنت استنى انا كنت هسيبها يا صاحبى خلاص
مش كنت ملاحظ شكوتى منها ان مفيش اخلاص
وان معنديش اى ادله بس عندى مجرد احساس
حسيت خيانتها ومش فارقه مع مين م الناس
احساسك ايه وانت معاها وشايفنى فى عينها
ملاحظتش ريحتى فى ايام كانت بينى وبينها
مجابتش فى سيرتى ؟ طيب لو غلطت بتردلى غيبتى!!
والله رغم الوجع المبكى بضحك على خيبتى !!!
مكنتش هتفرق واحده تخون ولا حتى انها تغلط فيا
كل ده بيهون
بس انت خيانتك وجعت عشره وصحبة عمر
انا هونت عليك وعليك قهرتى مش عايزه تمر
تقتلنى بسكينه رخيصه مسمومه بمر
فى الفجر ادعيلك من قلبى وانت بتقتلنى فى عز الضهر
بكره تخونك مع سين م الناس
اصل اللى شبهكوا مينفعش يعيشوا بإخلاص
وهقولك ايه اتهنوا بقذارتكم مع بعض
ربنا ريحنى ونجانى ورفعنى السما من سابع ارض
#قصيدة صاحب زور
