فى حب فصل الشتا هفضل اقول واقول
لو كان بإيدى السنه تفضل شتا على طول
حقك يا وقت الجمال دانت الجمال ذاته
وانت حبيب الروح قلبى ودقاته
مع انى ليا عتاب إتقبِّلوا منى
هو انت ليه لياليك دايما بتإلمنى
معرفش قصدك ايه لما تصحى الحنين
لناس كتير راحوا وحلفوا مش راجعين
تعرف يا عم الشتا .مانت اكيد عارف
فى كل ليل بيفوت بحيا وبرجع اموت
والذكرى واجعه الروح وانت اكيد شايف
طب نعمل ايه فى حبيب قرر يودعنا
تدفعنا ليه نشتاق وتدوس على وجعنا
حتى اللى تحت التراب تتعبنا ذكراهم
بتعيد مشاهد حنين ل حياتنا وياهم
عارف يا عم الشتا انك متقصدشي
وان الحنين غلاب لحاجات مكملتشي
بس انت ماترضاش للقلب بالتعذيب
حنن عليا الليل وصى النهار مايغيب
دا اللى يجيلك صبى بتخلى قلبه يشيب
احذر ليالى الشتا والوحده والقهوه
هتلاقى عمرك بيك راجع على سهوا
تلاته لو حضروا ماضمنش تلقى نهار
والله لو طوبه هتحس جسمك نار
اسمع نصيحة اخوك وبلاش تاخدها هزار
انا اه بحب الشتا لكن الحنين جبار
