قصيدة بعنوان
“سجن داخلي ”
حاليا …حاليا
في هذا الوقت
و ف كل سنة
من نفس ذات الوقت
تلاقيني ف سجن اسمه الحيره
لا عارف ادي حقوق جيرة
ولا اخاف من كتر جيب سيرة
اضحك و ابقي بتاع حكاوي كتيرة
و لا اكتم و أنا جوايا جبال
اعيش انا و اموت ف حبك
ولا من ضربة اقع و ملاقيش حتي حبال
انا سؤال …
إجابته سكوت
و حياة بتواجه موت
انا واحد حر و مربووط
انا متمكن من خوفي
انا واحد أن جعت
بعاقب جوفي
م الاخر ….
انا مسجون
انا حيران
عاقل جوايا مجنون
هادي قدامك
جوايا هيجان
انا الوقت اللي ف ساعتك يعدي مفيش
انا اللي بقول قدامك تعالي
و جوايا بيبقي ي ريت ميجيش
انا الحيران
رغم وجود كل الاجابات
انا مقفول
و جوايا مفتاح لكل البيبان
انا الكلمة الحلوة اللي بتفتح حوارات
و لقاء بيودع رايحات من غير جيات
انا الموجب وسط كل الأقطاب السالب
انا المسجون …..
ف سجن أفكاري
و كلامي الماحي العبارات
انا مهزوم وسط انتصارات
انا المتكلم و بناقش ف سكات
لا بيا دواد و لا انا جليات
و بوزع كهربا جلسات
و دوري ف دنيتك ملعون
مع أن كلامي ف وجودك ..موزون
انا مشتاق و عايز انسي
انا انفعالات علشان همسة
انا لمسة و مش محسوسة
انا حرب لكنها مش مدروسة
انا الابن اللي عايش ف دور الوالد
انا الحر اللي بيقنع نفسه بأنه بارد
انا الشارد وسط التركيز
و بساطة بيملاها تعجيز
انا العصبي قدامك شادد
و لكني هادي
انا البادي
و لكني مش اظلم
انا البحر بحتضن امواج
انا الغريب رغم ألفة المكان
انا الوان نفسية
و حروبي جوايا ومخفية
تلاقيني قدامك شبعان
و أنا ف أشد الاحتياج
انا بركان بيهدي غازاته
و سكوت بيطلع كلماته
انا ميت بروحين
انا فرعون …وسط كل المصريين
انا اصلا مش عارفني مين
ف بلاش انت تحاول تفهم
هتلاقي نفسك تعبان
و بحورك تملاها احزان
انا اصلا مش عارف
انا مسجون
انا حيران
