عبد العظيم رضا قصيدة”صُحابي”من ديوان”كالخمر”
..
لو بِكامل العَقل كُله
ولو لَفيت في العالم لَف
عَقلك مَعاهم لازم يتهَف
اللي بَتكلِم عَنهم دول صُحابي
أهلي وأحبابي
في الأوضه بَواقي سَجايرهُم
وصِدرك مِن كُتر دُخانهم يِضِيق
أكتر ناس جَنبي في وَقت الضِيق
وِسط صُحابي تِقدر تِبوح
بِكل الجِروح مِن غير أسباب
وتِقدر كَمان تِعيط جواهم مِن غير مايسمع إللي بَره الباب
مَفيش أبداً بِينا واحِد كَداب
رِيحة الوَفا والحُب مِنهم فَواحه
وأنا الصَراحه هَففني الشُوق
لَاقعده وسط صُحابي
وِفنجان قهوه زِياده
ولِنكُته قَديمه بايخَه
ولِهزار قديم سايِب عَلامه
ولِعيون شُجاعه مِش خَوافه
لَمتنا في الكافيه
خناقه ابو شَعر كَنيش علي باقي الإتنين جِنيه
وفَرحِتنا بِلمتنا حَواليه
الصُحاب دِلوقتي تِجري عَلي البَنات والحَشيش
بين صُحابي الكَلام دَه مَفيش
رَمية نَرد ولِعبه شيش البيش
غير جَدعَنتهم مَتلاقيش
لَو ليك صُحاب زَي صُحابي
تِبقي مَحظوظ
وصَدقني صُحاب كِي جِي غير صُحاب جامعَه
فمابالك يِبقوا هُما هُما
بِنَفس الشَكل
بِنَفس الطَبع
بِنَفس الإسم
رَبنا بيُرزق الواحِد بِصاحب واحِد في العُمر
وأظُن إن العُمر كُله صُحابي
وإني لِيا صَاحب في كُل عُمر
كُلهم صالحين مَفيهومش حَد يِضُر
وِجود الأكل يَعني يأكل الكُل
ولو مَفيش أكل يبقي الحمد لله كِده زي الفُل
ومازِلت مُصِر مَهما تِلف
في العالم لَف
لازِم عَقلَك وِسطُهم يِتهف
#عبدالعظيم_رضا
