قصيدة”مش مسمحاك”من ديوان “مافيش بينا اسف”
للكاتب والشاعر عبد العظيم رضا
…
مش مسمحاك…
انا جاي مش طالب السماح
انا جايلك وعاوزك بس
تسمعي..و تفهمي
اني مليش ذنب في كل اللي حصل
او حتي عليا لوم في اللي حالنا ليه وصل
تكون النهايه كده ده شئ غريب
مش بقول افتكري الحلو اللي كان بينا
انا بس هقول…
ان اللي بينا كان كله حلو
انا جاي مش طالب السماح
حقيقي في البُعد مش مرتاح
وعارف انها مش مشكلتك
وان البعد كان قرارك ومن اختيارك
بس اللي في قلبي ليكي ده خارج عن اختياراتك
عارفه…
اختياراتي كلها كانت انتي
مش بقول الكلام ده عشان تسامحيني
اسمعيني…
خلاص بالسرعه دي نسيتيني
خلاص زي ما بتقوليلهم كِرهتيني
عارف ان اعذارك معاكي للبعد
كئيب وعصبي وهزاري غشيم
لكن بلاش
بقيت قوليلي ازاي انا الكابوس اللي في حياتك
بكره الايام تلف وهتعرفي اني الوحيد اللي بقيلك
انا امانك….انا دارك…
انا حضن بتلجئيله لما حُزنك يزيد
متسامحنيش بس بلاش عياط
ولو جت سيرتي قدامك
يكفيكي السُكات
لكن بُعدك عني
مش هقول كسرني
لكن قواني وخلاني
بقيت لاول مره قاسي
واقولك شاطره
عارفه تعيشي حياتك
وبتضحكي وعادي الدنيا ماشيه
اما انا فمش بنام
ومازال عقلي بيلوم قلبي علي حُبك
ومازال قلبي مُصر انه علي حُبك مش ندمان
بحبك ومن كل قلبي مش زعلان
وصدقيني انا مش جايلك طالب السماح
فمتقوليش كل شويه مش مسمحاك
#عبدالعظيم_رضا
