قصيدة “كان واجب”
…
…..
كان واجب عليك تفهم
إن كل الامور ناتج فعل الامس
وكان لازم برضو تفهم إن بعض
القواعد والأمور ممنوع الاقتراب او اللمس
وان الانسان معرض للمس
بتدور ليه في أشيائك القديمه
مش جايز دي اول خطوات الفشل
بتدور ليه علي حضن وعلي وجود حد جنبك يسمعك
مع انك عارف انه عمره ما هيحس بيك
وان لو مليون حُضن حَضنك
هيفضل برضو ناقصك الحُضن اللي بيحتويك
لسه مصمم تدور وتتعب روحك
لسه برغم وجعك بتتمنظر
لسه مصمم تبان قوي
لسه بتختار الاسود
لسه عيونك بهتانه
لسه مدمن لحاجات مش موجوده
لسه بتوحشك؟
قولي بس ليه بتفكر فيهم قبل ما تنام
قولي لسه بيجوا في بالك
ولسه بتروح نفس الاماكن
لسه بتقول كان لابد ولكن
لسه بتسرح وسط اللمه
ولما يسألوك مالك تقول مافيش
لسه بتدور عليها في عيون البنات
لسه شايف كل البنات هي
لسه حضرتك بتدور علي حضرتك القديمه
لسه صحابك بيبيعوا فيك
لسه مفيش رد مفيش اجابه
لسه بتسمع واحد شتا وبتتمشي في عُزله
وتحن في يابنت حواء
لسه بتوه مع بدايه نوفمبر
لسه غاوي وبتقول لنفسك مليون شُكر
لسه عازف الناي ولسه قلوبنا بحور
ولسه رغم الحزن فاكرها
لسه بتقول ابويا قال
لسه رد وجواب الرساله الاولي مأثر عليك
ولا قريت التانيه ورجعت قولت
مفيش بينا اسف
لسه في عنك وبكتبني
لسه اتنين شتا بيطاردك
ملعون الغياب لسه في خلل
وسيناريو الوحده زي ماهو
ووحده هانم بتحضنك
لسه مأثره عليك ناس البارادويا
لسه في فنجان الصدفه ولا في توته بنوته
لسه الجو يشبه دلوقت ولسه الايام مكمله
لسه سارح في الميكروباص
ولا بتقرا رساله غريق ورساله احدهم
ولا يكونش توهت في بهلوان شعر
قولي حَضرت الحرب العالميه الرابعه
ولا بروفه وعندي فضول وكأني وكان زمان والخال وميم صاد راء وحمامه سلام لخبطتك
لسه كاميرا مان وياليل وملياش صُحاب والايام
وكانسر وسنين في العمر والاسم مش اسمي وورقه وقلم وبعد اللقا والسمره وسندريلا
ومن بنوته لاب والي حبيبتي والمدينه وحبيني مش وصلتك
ولا كل سنه وانت يا تسع حروف وقفتك
لسه جواك صدفه
ويابنت حواء اتنين مش مسمحاك
لسه لحالك والطريق عنيد
فهمت ان كل ده ناتج الامس ولا لا
لسه صحابك شايفينك عشان حبيت بجد ضعيف
لسه صحابك جنبك
ولا انتا زيي وحدك
حابب اعرف منك
لسه افكارك في الانتحار بتراودك
لسه بتكتب في النوت
ولسه بتدور في الذكريات
لسه في الذكريات ساكن
ومفيش حد علي سؤالك بيجاوبك
قولي لسه بتحب الاطفال
ولسه بتحب الحواديت
طيب لسه محتاج اللي يحكيلك حدوته
طيب لسه محتاج كتف تنام عليه وانت مطمن
لسه تايهه ولسه اول شعور بعد كلمه بحبك بيطاردك
حابب اعرف
لسه بيقولوا عليك كلام وهمي
لسه بتحب تبقي لوحدك
لسه بتحضنك الاغاني في الهاند فري
لسه عاوز تهرب مكان بعيد وحدك
لسه بتلوم نفسك
لسه برغم الوجع اللي جواك بيجيبوا اللوم عليك
لسه بتفتح السوشيال وتستني يكلموك
عرفني
لسه بتفتح فونك وتقلب في الصور
لسه بتدور علي اللي رحلوا وسابوك وحدك
لسه بتخجل ولسه بتخاف تبقي لوحدك
لسه بتقعد علي الكورنيش وحدك
لسه كلمه عادي مرفقاك
لسه بيقولوا عليك كئيب ومريض
لسه بيكدبوا احلامك
لسه مش راضي توجعهم بكلامك
…
كان واجب عليك ياصاحبي تفهم
ان كل الامور ناتج فعلك بالامس
وان كل الامور كل الامور
ممنوع فيها الاقتراب او اللمس
كان واجب عليك تفهم
ان لسه ولسه في حاجات كتير
#عبدالعظيم_رضا
