قصيدة “وحدي”من ديوان بارادويا
…
…
وحدي وعمري
ما احتاجت غير نفسي
محدش في وقت ما احتاجته لقيته
ولا حد عِرف يفرق كام مره ضِحكت
وانا من جوايا بموت
هو انا حد يعرف كام ليله نمت حزين
صدقني ولا واحد
وفي وقت الشده
كل الايادي كل الايادي
انسحبت من المشهد بالتدريج
جنبي القهوه والسجاير
الضلمه حضناني والحبر وسيله
لكنه بيبكيلي كل ما اقوله يلا نفضها سيره
بيبكي بحرقه والوحده بتقول
هتسيبني وتروح فين
الضلمه قالت
وانا فين الاقي حضن أأمن من حضنك
يواد من يوم ما حضنتك وانا عشقتك واول مره احس بالامان
يا ورقي مالك مستسلم للأمر
وسايب القلم يشكيلك
وانتا يا قلمي بتحكي كتير ليه الليله
يا قهوتي مالك؟
يا انا مالك متغيره كده ليه
وبقا غريب حالك
وليه حالفه الليله تكتبي اكتر
يكونش الحزن زارك؟
ولا هو ساكن فيكي
يمكن خلاص ؟
خلاص ايه يا ستي
..
مبعرفش اغني
لكني معايا حبري ورقي
وبحب ادندن
كلامي وانا لوحدي
بحسه ونس
لكني تعبت والله
وحتي مش قادر احكي
وانا من امتا يعني بحكي
حتي ابتدت عيني تنسحب
للداخل بالتدريج
..
داخل كل الحكاوي حد ناقص
داخل عنينا مواجع
يسلام لو نقابل حد يفهم
يسلام لو كان اللي قابلناهم
مكنوش يبقوا فتره
وبعد فتره يتركونا
ياريت لو كانوا فهموا
ان اللي زينا مينفعش يتخان
احنا اللي زينا
كلمه بسيطه وحلوه منك
ممكن تعيش معاه أيام وأيام
احنا اللي زينا بيكره الروتين
وبيحب يعيش الحياه بلا التزامات
احنا اللي زينا في زحمه وتوهة افكار
احنا اللي زينا بينام كل يوم
علي أمل بكره اكيد احسن
وبيصحي مفزوع من الصدمه
اللي زينا بيحبوا القهوه
وبيستخبوا في حضن الضلمه
بيحبوا اللمه برغم شعورهم فيها بالوحده
اللي زينا خنقتهم التفاصيل
اللي زينا شايل جواه كَسره وحيره
والم لكن عمره ما يبوح
ابسط رد مننا هيبقي
انا كويس الحمد لله
ومتسالش في ايه عشان مفيش
…
اللي زينا سرقوا منه الاكسجين
لكنه لسه مصمم يعيش
اللي زينا اتسرق منهم الوقت
اللي زينا كان فاضل علي حلمه خطوه
وبدون ما يقصد قرر يكمل في النزيف
اللي زينا بيعشق الهدوء
اللي زينا هادي لكنه مخنوق
اللي زينا عمره ما يبان مكسور
اللي زينا مداري كَسره جوا الكسور
اللي زينا مازال بيحاول يخطي السور
اللي زينا جيش كامل وليه أسطول
اللي زينا بيتقابلوا في الليل وسط الكراكيب
اللي زينا بيحبوا ام كلثوم
ويسرحوا ويا العندليب
ويحنوا مع فيروز
ويجوز تعاتبهم ورده
وبيدخنوا في الليل الناس
ويحكوا بكل قوتهم لقهوتهم
اللي زينا عايشين علي الذكري
اللي زينا كتيرلكن انا لسه وحدي
#عبدالعظيم_رضا
#ديوان_بارادويا #مصر
