قصة قصيرة بعنوان حكايه حب

#حياتي_في_سطور
#حكاية_حب
–
10-12-1989
عن طفل عمـره لا يتخطى 10 سنـوات
أول مرة شافهــــا قلبـــه دق 10 دقـات
طفلة جميلة بريئة أحلى من كل البنــات
إحساس رهيب قلبه اتفتت 10 فتفوتات
سهر ليلتها محتار هو أية دا الإحســاس
لكن فرحته غلبت حيرته وراح فـ النعاس
وكبر الطفل وهي ف قلبه كما الحــراس
ملكة متوجة يسكر من حبها ولا الكـاس
وراح الجامعة وهناك شاف بنات أشكال ألوان
لكن هيهات دا حبها مصان ورافض إنه يتهـان
وإتخرج وإتقدم لها وأهلها رفضوا لأنه غلبان
فقير معدوم … وأية يفيدها أنه عاشق ولهـان
لكن حبهم قِبل التحدي وكان أقوى من المال
كان عشقهم في نظر أهاليهم مجرد لعب عيال
رسموا خطط وخاطروا بحياتهم لتحقيق الآمال
وف النهاية استسلم الجميع وانتصــر الحبيبين
واتجوزا وعاشوا بفقرهم ف سعادة مبسوطين
وفي يوم رجع من شغلـــه حس ف عيونها بلمعــة
اترمت جوا حضنه وقالت قريب هينور بيتنا شمعة
فرح وضمها وقال إنتي عشقي ، والبيبي حيـاتي
وكل ليلة يحلم معاها ويتمنوا سوا أحلى الأمــاني
وفجأة وف ثواني
انطفت شمعـة حيـــاتي لمــا اتوفــــت بنتي
قبل ما تشوف نور الشمس وفارقت حضني
وإزدادت مصيبتي
وتوقفت أنفاسي لما لحقتهــا حـب عمــــري
واتنسفت فجأة كل أحلامي واتدمـر كيـــاني
وكل دا ف ساعات من أول سنة من زواجي
لكن حبيبتي إطمني
بعد رحمة ربي ليكي وليها .. حبــك ف قلبي
ساكن زي ما هو ” لا لا لا ” بل أكتر مـن الأول
ولا ف يــوم هنساكي … لا إنتي .. ولا بنتي
ربي يجمعني بكم ف الجنة زي مـا كنا الأول
——–
نصيحة من شخص فقد حب عمره
–
إختار شريكك وإصنعوا أجمل ذكريات
هييجي يوم يفارقك فتلاقي إنت لحظات
تعيش فيها بسعادة تنسيــك ألـم الفــراق
مش كل فراق بإيده في فــراق بالممات
لما تغمض عيونك تشوف طيفه معاك
ولما تفتحها تاني تلاقيه عايش جــواك
تمشي بين الوجوه تشوفها من سكــات
وكل وش منهم فيه من حبيبك حاجات
تروح مكان جمعكم تلاقي روحــه هنــاك
تقعد معاها ما تزهق وتعدي كتير ساعات
والناس حواليك بتسأل مجنون دا هو مين
وأنت ولا داري بيهم أنت في عالم جميـل
ابتسامة مالية وشك جوا شريط الذكريات
عايش هناك ويا حبك بترجــع بالسنيـــن
ولما تحب تمشي .. تلاقي روحك سبات
وتلاقي جسمك بيتقل وقلبك مليــان حنين
وعيونك لما تدمع وتسمع صوت الآنين
طالع من قلب قلبك فاقد حضن الغاليين
مش ناسي يا حب عمري معاك أجمل سنيــن
معاك كنت نفسي إنهاردة مش عارف أنا مين
بقلم # حمادة سعد