سيف زياد الرواجفة
الاردن
فكرة القصة مستوحاة من قصة بائعة الكبريت بس بشكل مختلف، يعني بأسلوبي الخاص.
.
” بائعة الكبريت ”
(ملاك)
في المسلسات او الأفلام اللي بنشوفها ما بكون في ولا غلطة بالمشاهد، المشهد هاذ اللي انت بتشوفه في وراه مخُرج ومنتج ومهندس صوت، بس اللي بزبط المشهد المُنتج بحذف الاخطاء بعدل لون الصورة عشان يعجب المُشاهد، بعيداً عن التمثيل بحياتنا احنا بحاجة للمنتج هاذ، في مشاهد لازم ما نمثلها ما في مخرج يحكيلك اعمل هيك او احكي هيك، فبيطلع عندك مشهد كامل متكامل.
.
“2010/9/1″
انا ملاك عمري 6 سنين بكرة اول يوم الي بالمدرسة كثير متحمسة، رح اصير معلمة بس اكبر زي ماما.
.
”1/10/2010”
انا ملاك عمري 6 سنين تعلمت كيف اكتب اسمي وارسم فراشة، رح اصير معلمة بس اكبر زي ماما والمس جميلة.
”1/11/2010″
انا ملاك عمري 6 سنين انا بكره المدرسة ما بدي اروح بتمسخروا علي عشاني قصيرة، رح اصير معلمة بس اكبر و اعاقب اللي بتنمّروا عالاطفال.
“1/12/2010”
انا ملاك عمري 6 سنين بابا راح عالجنة عند تيتا هيك ماما قالتلي، وانه مارح يتأخر ورح يرجع.
“1/1/2011”
انا ملاك عمري 6 سنين اشتقت لبابا كثير تأخر كثير بالجنة، بكتبله كل يوم
رسالة وبربطها على بلون وبتطير عنده بس هو ما رد علي ولا مرّة.
.
“30/1/2015”
انا ملاك عمري 11 سنة، لازم اكون بالصف السادس بس ماما كمان توّفت و ما ضل الي حدا عايشة عند هلأ عند بيت عمي وكثير منيح معي وحاول كثير انه يرجعني عالمدرسة بس انا ما بدي.
.
“2/9/2015”
انا ملاك عمري 11 سنة، اليوم اول يوم الي بالمدرسة بعد انقطاع سنة كاملة عنها، عمي كان كثير مبسوط اني رجعت عالمدرسة هو ما عنده ولاد لهيك بحكيلي اناديه بابا.
.
.
السلام عليكم كيفكم يا حلوات ان شاء الله عطلتكم منيحة كانت….. الطالبات: الحمد لله انبسطنا كثير يا مس…… طيب بما انه اليوم اول يوم دوام بالمدرسة بدي تعرفوني على حالكم وبعديها احكيلكم قصة بائعة الكبريت، نبدأ من عندك يا حلوة شو اسمك….. انا ملاك عمري 12 سنة….. بس انتي وياها ليش بتضحكو….. احكيلي يا ملاك ليش انتي مو بالصف السابع مع اللي بعمرك…. امي ماتت….. الله يرحمها، معلش يا حبيبتي هاذ حال الدنيا بتوخذ اللي بنحبهم دايماً….
.
ملاك بعقلها بتحكي (معلش؟؟!) كيف الها قلب تقول معلش…..
.
خلصت المعلمة تعرّف على باقي الطالبات وبدأت تحكيلهم عن قصة بائعة الكبريت، لفتت القصة انتباه ملاك وكيف انه بعود كبريت قدرت الطفلة تدفى بالبرد، رجعت ملاك عالبيت و كانت مشترية باكيت كبريت.
.
فتحت اليوتيوب لتحضر قصة بائعة الكبريت فيديو، تعلقت بالقصة كثير وحبتها، طفت التلفون وراحت تحت شجرة كينيا كبيرة كان ابوها عامللها مرجيحة عليها، مسكت بكيت الكبريت وولعت اول عود……
.
في لحظات بالعمر ما بتنتسى حزينة كانت او سعيدة او ممكن تكون لا توصف، بتضل تيجي عبالك لما تصفن او تسرح بخيالك، بتعيد المشهد بكل تفاصيله، دايماً حاول يكون عندك مخزون من اللحظات السعيدة اكبر من الحزينة او المؤلمة؛ عشان بعد ما تنتهي صفنتك تبتسم وتكمل حياتك وما تتنهد وتتضايق….
.
ولعت ملاك اول عود كبريت كان بإعتقادها إنه يصير معها زي بائعة الكبريت، بس ما تغير معها اشي زعلت وضلت تطلع عالارض نزلت دمعة حزينة على خدها الوردي وسكرت عيونها، فتحت ملاك عيونها شافت ابوها بنادي عليها عشان يركبها عالمرجيحة……. ملاك تعالي اركبك يلا…..بابا!؟،بابا شفت كابوس كثير بشع لا تتركني يا بابا الحمد لله اني صحيت من هالكابوس.
.
كانت ملاك حاضنة ابوها وبتشكي واقعها بأحلام اليقظة اللي فاتت فيها، بس للأسف صحيَت على صوت عمها وهو بنادي عليها، طلّت ملاك على حالها شافت عود الكبريت اللي ولعته بإيدها وكان رماد.
.
“3/9/2015”
رجعت ملاك من المدرسة وراحت تحت شجرة الكينيا نفسها وطلعت عود كبريت وولعته سكرت عيونها، فتحتهن سمعت صوت امها بتنادي عليها……. ملاك ملاك…. شفات امها قامت حضنتها وهي بتبكي…… وين رحتي يا ماما وتركتيني ليش خليتيني انتي و بابا……. احنا ما تركناكِ يا ملاك احنا دايماً معك وشافينك، بس احنا زعلانين منِّك ليش تركتي المدرسة، لازم ترجعي ملاك اللي بنعرفها القوية اللي دايماً بالمركز الاول……. ماما ليش بتقرصي بأصبعي ماما…. ماما.
.
خلص عود الكبريت وحرق اصبع ملاك كانت تفكر امها قرصتها، كلام امها ضل ببالها وضلت تسمعه، كتبته علي ورقة وكل يوم كانت تقرأه…..
.
“25/7/2021”
كان يوم مليئ بالاحتفالات والزوامير والفرح، كان يوم نتائج الثانوية العامة، ملاك ما كان الها نِفس تفرتح تشوف علامتها عارفة حالها ناجحة بس فرحتها ناقصة، كانت فرحتها بكل شي ناقصة، عمها طلع نتيجتها كانت ناجحة بمُعدَّل 88%، خبّرها بالنتيجة وهو فرحان ابتسمت وطلعت تتفرج على احتفالات الناس والسيارات.
.
نزلت ملاك عند شجرة الكينيا ومعها بكيت الكبريت، ولعت 3 اعواد بنفس اللحظة وسكرت عيونها، فتحت عيونها شافت امها وابوها قاعدين جنبها والفرحة واضحة على وجوهم……. كان نفسي توكنوا معي باللحظة هاي والله الفرحة ما الها طعم بدونكوا…… له يا ملاك قلتلك احنا دايماً معك وبكل وقت يلا روحي شوفي عمّك كيف فرحان فيكِ ومو معطي فرحتوا لحد……. بس يا ماما…… بدون بس، يلا يا بابا روحي افرحي بنجاحك و احنا معك دايماً….
.
“13/9/2021”
دخلت ملاك الجامعة وكانت منعزلة عن الطلاب ما كوّنت صداقات ولا تعرفت على حد كان تحضر المحاضرات وترجع عالبيت عطول.
.
“17/10/2021”
كان في احتفال بالكلية اللي بتدرس فيها ملاك، ملاك ما شاركت بالحفل طلعت قعدت تحت الشجر بتستنى آخر محاضرة عشان تروّح، تطَلَّعت ملاك حواليها شافت شب معها بالدفعة قاعد عكرسي وماسك عود كبريت مولع وبتفرج عليه، قامت ملاك……
.
.
اللقاء الأول دايماً بكون ذكرى، بنتذكرها بس تنتهي علاقتنا مع اي طرف بهاذ اللقاء، او نفس الطرف بذكرك فيه وبكون ذكرى سعيدة تتذكرها معه، لكن ماذا لو أصبح هذا اللقاء غُصة؟، ما بصير غُصة غير بس يستسلم احد الاطراف، وقتها بتحس إنك خسرت ايام وسنين من عمرك بيغشاك شعور الندم والحسرة…..!
.
“17/10/2021″
كان في احتفال بالكلية اللي بتدرس فيها ملاك، ملاك ما شاركت بالحفل طلعت قعدت تحت الشجر بتستنى آخر محاضرة عشان تروّح، تطَلَّعت ملاك حواليها شافت شب معها بالدفعة قاعد عكرسي وماسك عود كبريت مولع وبتفرج عليه، قامت ملاك ومشت باتجاهُه مُباشرة كان مبين عليه التأثر والاندماج مع عود الكبريت اللي بإيده، وقفت ملاك قدامه وانتبهلها حسّت عليه وراحت من عنده بسرعة وقعدت بمكان ثاني بعيد عنه، قام الشب يدوّر عليها لأنها لفتت انتباهه بالحركة تبعتها، لقاها قاعدة تحت شجرة ومولعة عود كبريت ومندمجة معه، وقف قدامها بنفس طريقتها وهي مندمجة كثير ما انتبهتله، وهو كمان اندمج معها والثنين اندمجو بنفس العود، رفعت راسها شافته مركز معها بعود الكبريت….
.
لو سمحت بقدر اخدمك بشي….. اه لا لا اسف، بس شفتك جيتي عندي قبل شوي ورحتي انا بقدر اخدمك بشي….. اه لا لا اسفه، بس لفت انتباهي قعدتك ونت مولِّع عود الكبريت….. اه يعني زي ما تقولي شغلة تعودت عليها من لما كنت صغير كنت بس ازعل او اتضايق بولع العود وبسرح بخيالي، وكمان انتي كنتي مولعه عود …… اه بصراحة انا كمان زيك تعودت عليها من لما كنت صغيرة، سمعت قصة بائعة الكبريت لما كنت بالمدرسة وجربت اعمل زيها فصارت عادة عندي بتهرب فيها من الواقع، صح ما سألتك عن اسمك…….. زيد، ونتي شو اسمك…… ملاك، محاضرتي باقيلها دقيقتين فرصة سعيدة…… ونا عندي محاضرة هسا، بنروح مع بعض.
.
رجعت ملاك من جامعتها وكان كل تفكيرها بزيد الّي شافته بيتصرف نفس تصرفها، ضلت تسأل حالها شو ممكن يكون صاير معه عشان يلجئ للخيال!
.
”18/10/2021”
طلعت ملاك من البيت بدري عشان تلحق محاضرة ال8 بس ما قدرت تصل عالوقت عشان الازمة الخانقة اللي الصبح وصلت الساعة 8:30-تقريبا، ما فاتت عالمحاضرة راحت تحت شجرتها المعتادة،لا إرادياً طالت عود كبريت و ولعته، أثناء اندماجها مع عود الكبريت كان واقف قدامها زيد…… مين زيد اهلا غريب مو بالمحاضرة….. ههههه هو مع الازمة هاي في حدا بقدر يلحق محاضرة اذا الدكتور نفسه متأخر اليوم ولغالها…… ههههه الحمد لله ما تسجلنا غياب…. اه والله، و انتي شو بتعملي هان؟…… انا كالعادة جيت اقعد والعب مع كبريتاتي…… طيب اذا ما فيها ازعاج او تطفل ممكن تحكيلي قصتك مع الكبريت……. لا عادي بحكيلك بس بشرط تحكيلي قصتك انت كمان….. ههههه ماشي.
.
حكت ملاك قصتها لزيد بالتفصيل وهو تأثر معها وواساها….. يلا مش قلت بدك تحكي قصتك…….ماشي، قصتي بدأت من لما……
.
.
لما يكون عندك كم هائل او فائض عن حدُّه من الذكريات السيئة او خوف من المستقبل المشرق اللي بنتظرك، او وجع أو مشاكلك اللي بتكون تافهة بالنسبة لغيرك، وقتها بتصير بدك حدا يسمعك يفهم مشكلتك شو ما كانت تافهة…..
.
“18/10/2021”
زيد حكا قصته لملاك، كان في شبه كبير بالقصص بس الفرق إنّه زيد امّه وأبوه انفصلوا عن بعض، معاناة زيد كانت بإنه ضايع بينهم مو لاقي ام تحتويه ولا لاقي اب يسانده، عاش عند امه اول سنين حياته بعدين زهقت منه وكرهته عشان ابوه، تزوجت امه من زلمة ثاني و ابوه نفس الاشي، كان بس يروح عند امّه زوجها يعامله بقسوة ويإذيه، ولما يروح عند ابوه مرت ابوه كانت اقسى عليه من زوج امه كمان، صار عمره 11 سنة وراح عاش عند جدته، جدته اللي كانت مغنييته عن امه وابوه عوّضته عن النقص اللي كان يحس فيه، ضل عند جدته لما صار عمره 15 سنة روّح يوم من المدرسة وكانت ريحة طبخ جدته معبية الحارة فات عندها ما لقاها بالمطبخ زي عادتها كانت متسطحة على تختها وتعبانة كثير……… مالك يا جدة؟…… ما في شي يا حبيبي روح طفي الغاز الاكل بكون استوى، واسمع قبل ما تروح(ايش ما صار يا زيد خليك قوي يا جدة انت زلمة قد حالك) هاي اخر اشي قالته جدة زيد قبل الشهادة، بعد ما خلصت مراسم الدفن والعزا اجا ابوه وعمامه وقسموا ورثة جدته وهو زعل كثير و ابوه اخذه وكمل حياته بدار ابوه.
.
“هي لحظةُ ضعفٍ في حياتِك او لحظةُ شعورٍ بالإنهزامِ من الممكن تُعطيكَ قوّةً تحارب بها كلَّ شيء ، ومن الممكن أن تبقى محبوسًا في ضعفك، فلتجعَلْ مِن هذه اللحظة جيشًا توجِه به نَفسَكَ أولاً ثُمّ واجِه العالَمَ بنفسك، هي فقط لحظة….”
.
وهاي هي قصتي يا ملاك……ان شاء الله بتهون….. إن شاء الله، ملاك المحاضرة الثانية قربت تبدا يلا نفوت…. يلا….
.
” نفس اليوم مساءاً”
وصلت رسالة لملاك من زيد….كيفك؟….. اهلا، منيحة…..شو رأيك نطلع نمشي؟ الجو حلو وبدي أسألك عن محاضرة اليوم……اوكي ما عندي مانع بس وين بدنا نروح…… تعالي بعدين بنقرر….. تمام نص ساعة وبكون تحت بستناك…..
.
الجو حلو صح….. اه والله بجنن يا زيد….. اه….. امممم، عن شو كنت بدك تسألني؟…….اه بصراحة ما فهمت محاضرة الكالكولاس اليوم والكل بيعرف انك شاطرة فيها فقلت لحالي بتشرحيلي اياها اذا ما فيها ازعاج يعني….. هههههه، لا عادي بشرحلك بس ليش ما حكيت هيك من اول كان جبت دفتري عشان اشرحلك منه او قعدنا ببيت عمي…… ما بعرف، خلص خليها لبكرة بالمكتبة…… تمام….. تمام، شو تشربي…. نسكافيه….تمام، ملاك بدي اسألك، ايش حلمِك اللي نفسك تحققيه…… شوف كل فترة بحياتي كان إلها حُلُم مُعيّن كنت اتمنى يتحقق بالفترة اللي بعيشها، بس الحُلم اللي بدي اياه يتحقق ويكون اله استمرارية طول فترة حياتي ما فكرت فيه، او يمكن ما صار معي شي بسببه يصير عندي حلم حياتي كاملة……. حلو تفكير منطقي بس في عندك خطأ بشغلة وحدة، كل فترة الها حلم معيّن ما بختلف معك فيها، بس إنّه حلم حياتك تستني انه يصير اشي عشان يتكوّن عندك هاذ الحلم هيك بتتأخري كثير عن حالك، لازم تحطي لنفسك حلم وتسعي عشانه يعني بكون هو الاشي الرئيسي واحلام الفترات احلام فرعية بتكون حتى لو ما تحققت بتقدري تحققيها مرة ثانية بوقت ثاني بس حلم الحياة لأ عشان هيك لازم تسعي إلُه وتحاربي عشانه، اعطيك مثال في ناس حلم حياتها يكون معهم ملايين، هاذ انا بعتبره حلم فرعي بتقدري بأي وقت تحققه صح بدُّه تعب وجهد بس بتقدرت تحققه لو فشلت الف مرة……..طيب انت شو حلم حياتك؟…… انا لسا ما اخترت حلم حياتي بس لسا ما حِلمتُه عشان ابدا بتحقيقه….. شو هو طيب؟……. انا ما بحلم بالمصاري لأنها رزق من عند الله، ولا بالنجاح لأنه بتقدر بأي وقت تكون ناجح، انا حلمي ممكن يصير كابوس بأي لحظة، حلم حياتي هو انسان تخيلي رابط حياتي كُلها بإنسان بس لسا ما لقيته او هو ما لاقاني، يعني لما انت تحب بني ادم من قلبك وهو كذلك بتبني على هاذ الاساس نظام حياتك لأنه رح يضل معك طول العمر، ما رح تقدر تعيش مع غيرُه او تقدر تتعامَل مع البُعد عنُّه، و كمان بتصير تحقق بأحلامك الفرعية عشانك وعشانه……. بصراحة مو عارفة كيف ارد عليك غير إني اضل صافنة……… ههههههه عادي بدها صفنة الشغلة.
.
“8/6/2026”
تخرّج زيد وملاك من الجامعة سنة “2025”، زيد توّظف على شهادته بسرعة لأنه تخرج بإمتياز وماخذ كثير دورات توظف بشركة خاصة طبعاً، وملاك ما قدمت على شغل عمها حكالها ما رح يقصر معها بإشي وبدها تشتغل هي حرّة، طبعا زيد وملاك عاشوا قِصّة حُب جميلة بأيام الجامعة واستمرت لبعد التخرج لليوم…..
.
الو…… هلا زيد كيفك…. تمام، وينك هسا….. بالبيت ليش؟…. طيب ساعة زمن وبكون عند اول الشارع بدي اياكِ بموضوع كثير ضروري….. تمام لما توصل رنلي…. تمام.
“بعد ساعة”
ولك زيد شوفي خوفتني ترى…… ما في شي حبيبتي بس بدي احكي معك بموضوع بخصنا الثنين…… احكي يلا…. خذي هاذ…. شو هاذ…. شو شايفة انتي…. بكيت كيبريت؟!!، بس ليش….. افتحيه.
.
فتحت ملاك بكيت الكبريت لقت فيه عودين وخاتم و ورقة مكتوب عليها تتزوجيني، تفاجأت هي من الموضوع والطريقة وسألته….. ليش في بالبكيت عودين بس؟…… قبل ما اجاوبك بدي اسألك متى اخر مرة ولعتي في عود كبريت؟…… بصراحة ما بتذكّر بس كأنه بالسنة الثانية ايام الجامعه…… اه تمام وبعد هيك اش صار بالسنة الثانية؟…… تصارحنا بحُبنا….. ايوه وبعد هيك ما ولعنا ولا عود كبريت لا انا ولا انتي، و انتي عارفة وانت ياللي بتقرأ عارف، ليش كنا نولع الكبريت، وحنا مع بعض ما احتجنا نهرب من الواقع للكبريت عملنا لحالنا الواقع اللي بدنا اياه بالحقيقة مو بأحلام اليقظة؛ عشان هيك انا بدي اتقدملك الأسبوع الجاي، وجبت معي عودين الكبريت هذول عشان نولعهم هسا ويكونوا اخر عودين نولعهم بحياتنا…..
.
ولّع زيد وملاك كل واحد عودُه وعيونهم بعيون بعض وما حسّوا بالعود غير لما لسعهم….
.
”15/6/2026″
شو بتشتغل يا زيد….. مهندس مدني…… طيب عندك بيت وسيارة…… اه الحمد لله عندي شقة وعندي سيارة كمان…… تمام، كيف تعرفت على ملاك…… زميلتي بالجامعه كانت….. امممم، طيب خليني اسألها و ارجعلك…. خذ راحتك عمي….. ملاك هاذ كيف جاي بدون اهلوا؟….. يا عمو ابوه و أمه متطلقين وكل واحد فيهم تجوز وشاف حياته وهو بنى حالو لحاله….. حتى لو متطلقين ليش ما اجا ابوه معه اقل ما فيها او واحد كبير من عيلته، انا رايح اطردُه……. يا عمو لا لا مشان الله لا…… و انتي ليش هيك ميتة عليه في اشي بينكم….. لا يا عمو انت فهمتني غلط….. ابعدي عني، اسمع يا زيد انت لا جايب معك لا ابوك ولا عمك ولا خالك حتى، جايني لحالك هيك مو هيك عوايدنا ولا تقاليدنا….. يا عمي خليني اشرحلك وضعي مع اهلي، انا كنت بدي احكيلك وقالتلي ملاك انك متفهّم وقلبك كبير…… قالتلك ملاك اه اطلع برّة ما بدي اشوف وجهك بحياتي……. الله يسامحك يا عمي الله يسامحك……
.
رجع زيد على بيته وكانت حالته سيئة جداً ما قدِر يستوعب الموضوع وضل بحالة صدمة ثلاث ايام، وملاك صار معها نفس الشي نزلت عند شجرة الكينيا و طلعت بكيت الكبريت وولّعت منه عود سكرت عيونها وفتحتهم شافت امها قدامها قامت حضنتها وصارت تبكي…… ليش هيك بصير معي يا ماما انا شو عملت بحياتي عشان اتجازى هيك جزى ليش يا ماما ليش……. مسحت امها دموعها وقالتلها……. ملاك خليكِ قوية زي ما بعرفك زيد ما رح يتخلّى عنِّك وعمك بحبك ورح يقتنع انتي هدي حالك واصبري يا بنتي اصبري…..
.
“5/7/2026″
كان عم ملاك طالع من شغله وبطريقه عالبيت، اعترض طريقه زيد نزل من سيارته وحكاله……. عمي لازم نحكي ولازم تسمعني….. ما الي معك حكي انا وابعد عن السيارة بلاش ادعسك…..
ركب زيد معه بالسيارة وما رضي يبعد عنه وعم ملاك ضل ماشي…… يا عمي انا عارف انك ربيت ملاك وتعبت عليها زي كأنها بنتك وأكثر وهي كانت تحكيلي هاذ الشي، بدي اسألك ما كنت تلاحظ عليها انها بتولع كبريت وبتقعد لحالها كثير كانت تعيش بخيالها كانت تتخيل امها وابوها بس تولع الكبريت كانت تتهرب من واقعها يا عمي، بس من بعد ما تعرفنا على بعض بطلت تتهرب من اشي، حست معي بالأمان أكثر منك فإذا انت بتحب بنت اخوك عنجد لا توقف بطريقنا هي رقمي رح اخليه معك ونزلني هان برجع للسيارة مشي……
.
نزل زيد من السيارة والعم ما حكا ولا كلمة ضل يفكر بكلام زيد لما وصل البيت، اول ما فات شاف ملاك قاعدة تحت شجرة الكينيا ومولعة عود كبريت وبتتفرج عليه، ما حكا معها اشي ضل فايت عالبيت عطول…..
.
” 7/7/2026”
الو السلام عليكم…..وعليكم السلام، مين معي عفواً…..هههههه معقول نسيت لمين اعطيت رقمك اخر شي…… عم ملاك أهلا عمي اهلا……. اهلين فيك يا عمي، شوف بصراحة انا فكرت بحكيك كثير وحسيت إنّك صادق وما رح تفرّط بملاك، عشان هيك بتيجي تتفضل عندي بكرة واللي بدكم اياه بصير ان شاء الله…….. الله يبارك بعمرك يا عمي، بس انا عندي مشكلة…… خير شو في يا زيد….. عمي انا ما رح اقدر اجيب حدا معي بصراحة…….. اسكت لا تكمِّل زي ما انا عم ملاك ومسؤول عنها كمان انا عمّك ومسؤول عنك انت وملاك زي ولادي، انا بطلبها من حالي الك وبعطيها الك ان شاء الله، بس في شغلة لا تحكي لملاك اني حكيت معك خلي الموضوع مفاجأة الها……. ما كذبت ملاك بس قالت عنك انسان راقي، اللي بدك اياه بصير يا عم…..
.
“8/7/2026”
اخذ العم مغادرة من شغله بدري ورجع عالبيت عشان يجهّز هو ومرته للخطبة وملاك كانت طالعة عند صاحبيتها وما بتعرف عن اشي،رجعت ملاك عالبيت لقت عمها قاعد ومكشر، ما حكت معه ولا كلمة فاتت على غرفتها وطلعت ضلّت قاعدة تحت شجرة الكينيا للمسا..
.
الو….. هلا زيد…..اهلين عمي انا صرت قريب عليكم….. ماشي يا عمي هي ملاك تحت شجرتها ومولعة كبريت فوت وخبرها بطريقتك…… تمام يا عمي.
.
فات زيد على ملاك وهي تحت الشجرة وكانت مركزة بعود الكبريت وما شافته، استنى زيد العود لما خلص عشان يحكيلها بس ما انتبهتله نهائيا وطلعت عود ثاني وولعته، طفى زيد العود وطل بعيونها وحالكها……. بلّشت “قصتنا يا بائعة الكبريت”.
.
.
النهاية