قصيدة خلل للشاعر عبد العظيم رضا

قصيدة”خلل”
…
…

واحد
علي سريرك
حضناك الضلمه
فونك بطاريته 100%
فاتح صوره قديمه ما بينك وبينها
عمال تحكي مع صورها وتعاتبها
فاتح ليه الشات
اديك بتقرأ في مواقف وحكايات
وعمال تعيش كل كلمه
وعمال تفسر كل جمله
جاي في بالك دلوقتي انها نسياك
ولا جاي في بالك انها ازاي مبقتش معاك
مخدتك دمعت وهي باصه معاك
شكلها حست بيك
ولا يكونش دي دموعك
وعيونك مش حاسه
في اكيد خلل
…
اتنين
علي سريرك حضناك الضلمه
البطاريه75%
الصور دي لا
الصور دي احلي
بتعمل زووم علي ايه
وحشتك عينها
مكانت جنبك
فتحت الريكورد ليه
بتسمع صوتها
مكانت بترن
وحضرتك تملي تطنش
ايه اللي حصل
عرفت دلوقتي قيمتها
ولا انتا كسرت بنوته غيرها
وربنا بيخلص منك
في اكيد خلل
…..
تلاته
علي سريرك
حضناك الضلمه
البطاريه 50%
مش واخد بالك وبالصدفه
فاتح الشات
جت قدامك مسدج فيها
بحبك وحشتني
طب ايه ايدك بترتعش ليه
قلبك دقاته زايده ليه
عقلك وقف تفكير ليه
اتلاهيت تاني في ايه
يادي الصور
عامل زووم علي ضحكتها ليه
وحشتك ضحكتها
مكانت تضحك تقولها
اتلمي كفايه هزار
بتسمع ليه صوتها في الريكورد
مكانت كل ما ترن علي حضرتك
تلاقي حضرتك انتظار
في اكيد خلل
….
اربعه
علي نفس سريرك
في نفس حضن الضلمه
البطاريه25%
ايه مش متعصب ليه
دلوقتي من مسدج انا نازله مع صحابي
ولا المسدج مبقاش ليها عوزه
ولا عِرفت انها لو كانت عاوزه تروح
من غير ما تقولك كانت راحت
عرفت انك غلطان
بتتاسف لمين يا حمار
لشاشه فونك
ولا لمخدتك
ولا لضلمتك
ولا لوحدتك
ولا لصوره قديمه
ولا لنفسك
اكيد في خلل
…..
خمسه
بتعيط لسه في حضن الضلمه
وسريرك مل منك
ومخدتك لسه بتعيط
وفونك صفر في الميه
تصبح علي خير
ونام يلي كنت مفكر
بنات الناس تسليه
#عبدالعظيم_رضا