جاها أبوها ف يوم فرحان
كانت قاعدة ف وسط ألعاب
حوالين منها ..عروسة و شنطة
فيها أقلام …كراريس وكتاب
كان الصبح مهندم نفسه ..
وشه بيضحك ليها كتير
يعكس جوا عيونها الفرحة
تلبس روحها السعد بطرحة
تخرج لاجل…. تلف تطير
جاها أبوها بدون م يقول
قامت فجأة بدون أسباب
قلها سيبي اللعب يا فاطمة
جاني اليوم.. عبد الوهاب
لاجل م يطلب إيدك مني
قمت وافقت ..شربنا الشاي
شافت فاطمة الدنيا بتقفل
صوت كروانها بيصبح ناي
فاقت صرخة بصوت ” إزاي ؟؟”
دا أنا لسَّاني اطناشر عام
هو دا برضو يا أبويا كلام ؟؟
رد عليها بشبه طناش ..
أو كان قصده ما يسمعهاش :
“أصله دا كان شغال ف الخارج
لسا امبارح واصل جاي
يعني معبي جيوبة مريش
مش راح يرفض ف الطلبات”
جف الدم ف جوفها و مات
قالت ” يعني بجد خلاص
هأصبح بيعة بضربة فاس ؟ ”
دا اللي ف سوق الجمعة
بيفطن ..لو راح يعرض
يوم” بلاص”!!
و إنتا يا ابويا برغم غلاوتي
هونت عليك و بدون أسباب!!
جالك يعرض نفسه بماله
قولت عريسك عبوهاب ؟!!!!!
قال لها بس يا ناقصة رباية
واجهزى ف الأيام الجاية
لاجل خطيبك عبوهاب
و اعرفي إنه ف شهر و يوم
راح يتحدد كتب كتاب
حست نور الدنيا بيدبل
أو يتشكل ضلمة ..خيوط
بقيت زي غريقة بتغرق
بس البحر مخبي شطوط
ظلم القلب يا خلق الله
أصعب حتى من السكين
و أفظع كسرة لقلب نضيف
يصبح عاجز أو…. مسكين
قالت لااااا..
.. أنا مش هتجوز
لو راح تحرق جسمي بنار
قام مديها بكفة إيده
قالها عاوزة تجيبى العار ؟
عاوزة الناس كدا تاكل وشى
عاوزة الغم يعم الدار !!
مالها السترة يا ولدة شوم ؟
عاوزة تجيبي لعمري اللوم ؟
قولت المدة ف شهر و يوم
و إن تعصيلي الأمر يا فاطمة
يصبح دمك ….عندي حلال!!
كان الدمع أتمد و سال
خد البت ..و فوق الحال
قالت باكية بصوت مبحوح
عاوزة أتعلم يا أبا وأكون
هوا يا أبويا علامى حرام ؟!
قالها سترة ف بيت مضمون
هوا دا عين العقل…. تمام
قالت يا أبا دا رزق المولى
لما يريده ف ثانية يكون !!
لسا أوانه مجاش ناحيتنا
هوا أنا فاتني و عشت بدون ؟!!
عمري صغير لسا و ربي !!
يعقد بينا إزاي مأزون ؟؟.
طنش تاني كلامها و قال
سيبك ..كل دا شغل عيال
وقت الجد بنبقى رجال
كلمة بتغرس عمر سنين
قامت قايلة بدمع و لين
يا أبا بحق الله و الدين
سيبني أحدد أخد مين
و أنا و الله ما أعوزلك ذلة
ولا عاوزة أرمي القول
ف الطين !!
بس الأمر يا أبويا فاجأني
قبل م وقته الأصلي يحين !!
فكر أبوها ف كل كلامها
أدرك إن كلامها صحيح
بس يا سادة الطبع بيغلب
فجأة بيرجع مخه الميح
أدى الفرجة على المخروب
خلت مخ البت يبوظ
خلى البت تعاند أبوها
أما صحيح الخلفة حظوظ
وأنا دا حظى وبختى المايل
يلا يا رب تعدى جمايل
بكرة معادهم يجوا زيارة
عاوز حالك عال العال ..
و البسي هدمة من أمك يعني
بطَّلي…. تلبسي لبس عيال
و أوعي تقولي القول إياه
هقطع حسك و أبري لسان
حطي ف عقلك كل كلامي
و أوي تسوقي ف أي جنان
كانت فاطمة ف عالم تاني
عالم عدى حدود الدار
أصعب حسرة اتحطت فيها
ترفع جوا ضلوعها النار
نامت ليلة بدون م تنام
بين كوابيسها و بالأحلام
شافت شوك الدنيا بيغرس
نفسه.. و يوجع ف الأيام
حست دمع عيونها بيرخص
يوم م اتحدد يبقى بكام!!!! .
طلعت شمس الصبح أخيراً
نورها مخبي وجوده غيوم
تشعر إن خَضار الغيط ..
أصبح عابس أو مهموم
فاطمة و بعد م سابها النوم
قامت يعني بدون م تقوم
صار الجسم بتقل جبال
رغم الضعف و نقص الحيل
قامت من كوابيس الليل
دمعة بتاخد شكل الويل
أصل الفرح بهم يزول
رفضت تفطر أو تتغدى
رغم الشخط و شتم الغول
لبست غصب اللبس إياه
لاجل م تاخد عرض و طول
جهزت قرب أدان العصر
هوا دا أقرب وقت يكون
لأجل م يجي لحد ضيوف
طلعت فوق السطح تشوف
امته هييجوا وامته الوقت
لكن فجأة تحس بضعف
رفض الأكل يسيبها تدوخ
تشعر إن الأرض شروخ
من دوارها ف حفرة و فحت
تشعر لما تبص لتحت
إن الدنيا تلف تدور
فجأة بتفقد كل ثباتها
وتنزل على أسياخ السور
ينزل دم ..ف كل مكان
فجأة بتملى الحتة جيران
تطلع صرخة بفرط الهول
تغزل حزن ف أبشع نول
يفرد حسرة بطعم جراح
يطلع أبوها وأمها فجأة
يلقوا الدم ف سورهم ساح
يطلع أبوها وأمها يبكوا
بعد م فات الوقت وراح
تبقى جنازة ودمع وموت
بعد م كان اليوم أفراح
ماتت فاطمة وكل لعبها
لسا بتشهد ع الأيام
ظلم بريئة بدون أسباب
كل آمالها بأنها تحيا
بس أملها اترد و خاب
هيا ضحية لجهل سنين
أصبح أسوأ شىء مفروض
لو فكرنا بعقل ومنطق
عمر م طفلة هتصبح فاطمة
عمر م حالة فاطمة تعود
عمر م حالة فاطمة تعود