في الشارع انا ساكن فوق رصيف في حارة سد
منغطي بتوب داكن في ليالي كتير عز البرد
وجنبي فيه كلاب سعرانة قطعوا توبي م الشد
وانا ساكت عشان خايف علي ولدي وولد الولد
بطاطي راسي عشان اعدي نفق الحياة بجري وبمد
ورجلي العارجة مش قادرة توصلني لحلم الغد
وفوق صدري شايل ورقة كتبتها انا بخط اليد
املي اتنشل وسط الزحمة وانا لسة رضيع في المهد
ووشي اصفر بقي يشبه لمون دبلان مابيطعم حد
جبل الصبر كان راسخ جوايا مالقتهوش باينه اتهد
فتته جراح الليالي والاساوة والسنين شدتني شد
وسط بحر موجه عالي ودوامات من كل حد
وانا غريق ومتعلق فى قشاية وماسك بحبل الود
وشايف مركبة احلام بتعدي في عيون الولد
لاقيت برضة الكلاب جاية تجري ورايا تاني بتمد
قولت ابعدوا عني وفارقوني زهقتوني مليت بجد
بقيت عريان لاليا توب يسترني وبتكتك عز البرد
في الشارع
