قصيدة “حبيني”
….
حبيني زي ما انا
بعصبيتي الزايده
وحياتي المتبهدله
وحركاتي الطايشه المتكررره
بالغشيم هزاري
بدمي الحامي
بحكاويا
بالغريبه اغانيا
بقله تركيزي وتوتري لما بشوف عنيكي
بإهتمامي الزايد اوقات
وبعدم الزايد اوقات
بكلامي
بأسئلتي الكتير
بغيرتي الزايده
بإهتمامي بالتفاصيل
حبيني
وقت الغلط ابنك
وقت خوفك ابوكي
وقت العتاب احباب
وقت الصراحه اخوكي
حبيني يا كل حواديتي
يا الف طاهره ناصعه بياض
وهمزته شتا ممطر وضاء
وهمزه اخر الاسم زاده جمال
في عيونك سحر
وفي حضنك امان
يا شاغله العقل
وساكنه القلب
يا مصدر الضحكه
ورصاصه في الوش اسمها غمازه
مش كفايه بقا
وقوليلي لما المأذون يحضر
…..لما الماذون يحضر
والشربات يتوزع
وصوت الزغاريط يعلي
هتبصيلي وتضحكي
ولا هتعيطي واخدك في حضني
واقولك انك وعهد الله تستاهلي
فتبصيلي وتضحكي وتقولي بحبك
يا الف كيان وهمزته محبه
حبيني برغم البهدله
لإدماني للقهوه
حبيني
في عدم وقتي الضايع والإلتزام
وفي الضايع سعات وقتي
حبيني لحد ما اقابلك
ولما اقابلك هنتخانق من غير مدت ايدي
وفي النهايه هخيرك
يا تحبيني يا تحبيني
او حبيني لاني تعبت
انا عكازك
بدون فعل وبدون كلام
حاسس انك متلغبطه كده وتايها
ولاي قرار في حياتك مش مستعده
بتخانقي تملي اللي حواليكي
وبتصحي من نومك
تستني اللحظه اللي فيها ترجعي تنامي تاني
وكل حاجه في حياتك بقت عادي
والوجع اللي في وسط هزارك ظاهر
حد لاحظه ولا محدش همه
وطبعا مخدتك بتنشع دموع
وقلبك بيعيط في اليوم ميت مره
وكل اللي كان عارفك زمان
قال عليكي متغيره
لكن انتي مُصره انك زي منتي
وانا بقولك اهو
انك مهما كبرتي هتفضلي
دلعوتي بطله حكايتي الصغننه
فحالك ده ياريت ما يدومشي
ولو كلامي ضايقكك ومصممه امشي
فمش همشي
ولا اقولك
قوليها وهمشي
اه هيوجعني قلبي
لكن انا في صحرا خاويه مبحبش امشي
ولو علي مكانتك الكبيره في قلبي
فدي بقا ربنا اعلم بيها
بلاش الحال ده
او قوليلي
الحال ده لحد امتا
دلوقتي مش بجبرك تحبيني
انا بس هقولك بلاش تخسريني
انتي دلوقتي شخص غير اللي عرفته زمان
بس انتي بالنسبالي ادمان
ودلوقت انا شخص غير اللي انتي زمان عرفتيه
لكن والله بني ادم قلبه مش ليه
اصل الحب مش بالعافيه ولا بالاجبار
الحب ده شئ مش باليد ولا الاختيار
الحب شئ حسه العصفور اتغني بيه
ودقات القلب السريعه الوحيده التأكيد ليه
وراحتك في حضن حبيبك وشعورك بالامان
برضو دي كمان دليل ليه
حبيني زي ماانا
بعصبيتي الزايده
وحياتي المتبهدله
وحركاتي الطايشه المتكرره
بالغشيم هزاري
بدمي الحامي
حبيني
لاني وعهد الله بحبك
#عبدالعظيم_رضا
