قصيدة “واحد شتا”
…
تشرب إيه؟
واحد شتا وإتنين نجوم وقمر
وحدك في الشتا مابين نجوم ومطره وقمر
مشاعرك في كاس الشتا تصبح برواز
ام كلثوم في الهاند فري
بتغني سيره الحب
بدايه الحب نظره
وأخره انعزال
القلب إليك ميال
يا شاغل البال
يا طير طليق بعيد
لكنه من القلب قريب
وحشتني
…
كلامهم بالنسبالك دبش
وكل اللي شافك عاقل إتهبل
ولما شاف الضحكه علي وشك كَش
إحنا أصلاً مرضي
واكتئابنا نزيف داخلي
القلب من كُتر الوجع خلي
وعقاب روحنا في الشتا
نزيف متتالي مبيوقفش
قطر حياتنا قالوا عليه مبيعطلش
وليل الشتا يكسر القلب الهش
كلنا كلنا ….
إتكسر جوانا شئ ميتعوضش
ولما شافونا استغربوا
ناقصنا وعهد الله شويه فرص
وحد يسمعنا يخفف عننا
مش كل ما نيجي نحكي
يقولك همك عمره ما هيبقي زي همنا
همك ايه بس يا شتا
وانت بتخلينا
نحن ونشتاق ونراجع ذكريات
ونكتب ونسرح ونتوه وننسي ونرجع نفتكر
كلنا محتاجين حد يبقا زينا
يشبهنا لكنه مش نفسنا
كلنا جوانا هموم
وكوم ذكريات
ووجعنا فراق حد مات
واللي جاي واللي فايت من عمرنا فات
وأشيائنا البسيطه في الشتا بتبسط فينا
لكن حسدنا عليها
والمطره بتغسل روحنا
وقهوتنا يبتسمعنا من غير ما تمل مننا
والرعد بيحرك مشاعر جواك
وريحه الجو بعد المطر
فكرتك بحاجات فيتاك
صحاب العمر بكره يفتوك
واللي سايبين معاك ذكري اديهم نسيوك
وست الحسن حبيبتك
عماله بتلعن كل ميتينك
واهي الايام بصالك بعين قناص
بتحدف الوجع علي قلب رصاص
لقلبك شكراً
وللشتا عقدين فل
صدقني خسرت الكل
وبقا مش فارق
مين موجود ومين ماشي
ولا مين مكمل ومين باقي
القلب أصبح حجر
يعني لا الفراق هياثر
ولا القرب هيسيب اثر
كل اللي كان وجعك مبقاش سايب علامه
وكأنه إتمسح
مبقاش الحب ليه مكان جواك
وكل كلام الحب والغزل مبقاش يأثر فيك
واثق من الغدر حتي من اقرب الناس ليك
وهي اختارت السير مع غيرك في غير طريق
وعماله تمدح فيه
وتقول كلام مش فيه
من غير ما تعرف إن كل ده
مشاعر شِتويه مش ليه
…
مجاش علي بالك أبداً إنها تئذيك
وتهجر وتنساك
واحد شتا علي عيونك
أديك دلوقتي وحداني
عمال تلعن في الحب وسيرته
قولي ذاكرت الدرس كويس وإتعلمته
إتعلمته …
وكمان حفظت المنهج بالنص
إن جيت للحق كان المفروض
تمسك العصايه من الاول من النص
لكن
اهو ده اللي صار
كل شئ جوانا حلو بدون ما نقصد طار
وبُنك في عز وجعك حب يضايقك فار
قافل علي قلبك وحابس حالك جوا غار
قلبك اصيل لكن قلب الغير عايب غيار
…
والشتا لعنه
لكنه بنك معرفه
ومشاعرنا في الشتا بتقصد توجعنا
وكأننا قاصدين نوجع قلبنا
فبنحب ناس مش بتحبنا
ونبيع في ناس كانت تتمني القرب مننا
ونشتري في ناس تعابين ولا شاغلهم همنا
يارب ارزقنا بالناس اللي تخفف عننا
للشتويين المجروحين المظلومين اللي زينا
بحبكم….. بحبكم
دور في الليل في بلكونات الشتا
هتلاقي بلكونه سرحان
بلكونه قلقان
بلكونه بتتمني
بلكونه في فرح بتتهني
وبلكونه طالع منها صوت ام كلثوم وشاعر بيقول
فيتاك يا سيدي صدقني وماشيه
تاعب قلبك ليه
وتاعب الشتا وياك
قالت هستناك
واديها بعدت ونسياك
ابعد عننا يارب
كل البياعين الخاينين اللي لوعودهم مش بيصونوا
في الشتا الوعود قليله
لكنها صادقه ومن ناس صدقني معاك مكمله
في بند الشتا
لا السجاير ولا الاغاني هتدفي روحك
حضن واحد بس وهتكمل دون اسئله
للنوم في الشتا لزوم
اولها انك مرتاح البال
مش تفتح شات قديم
وتفضل تعمل زوم علي كل صوركوا
وتحزن في كل صوره من قبل فيها فرحتوا
لو عندك في الشتا حبيب يبقي عمرك ما جربت برد الشتا
ولو معندكش يبقي اتفضل واحد شتا
خريف القلوب شتا
وربيع المرتبطين شتا
وناصيه المجروحين شتا
الشتا ارشيف
في الشتا ذكري علي كل رصيف
الشتا امان لناسه
برغم انه لغيرهم مخيف
خِف علي المجروحين يا شتا
ولا انتا كمان مبقاش يهمك همنا
في الشتا كل الناس بتقفل الشبابيك
وكل شبابيك الشتا وراها حكايات
يعني مثلا
شباك بنوته حزينه
بتسيل الدموع من عنيها
وشباك بنوته بتقتل ذكرياتها فيها
وشباك كله ورد
وشباك تذاكر محبه وود
وشباك لو طَلت عليه عينك تعرف انه كئيب
طالع منه صوت ام كلثوم بتغني سيره الحب
بدايه الحب فرحه
واخره انعزال
القلب إليك ميال
يا شاغل البال
يا طير طليق بعيد
لكنه من القلب قريب
وحشتني.
#عبدالعظيم_رضا
