#فين_الشعر
هو فين الشعر
ولا مين عاد بيكتب شعر
دا القافيه مسروقه
والحرف مات مالقهر
عشان واحد يتسمى شاعر
لازم يصهر المعنى صهر
مايكونشى بنّا يبنى حيطان
بكلام عادم وبحروف خُضر
لازم يشوف الشعر محراب
والكلمه زى العروسه البِكر
الشعر عريس لو جالك
تقبل نَسبه من غير مهر
الشعر توب لو تلبسه
كأنك أمير فى القصر
الشعر أيوب فى الصبر
الشعر عزيز النفس غالى
لا يقبل طلب ولا أمر
ييجى بميزان الدهب
يرسم كلامه زى الدر
يخلى اللى قاله سلطان
جيشه حروف بتملى البر
الشعر نخله شابّه عاليه
مزروعه على شط نهر
توزع تمرها على كل محتاج
للغذا فى الادب والفكر
الشعر بيغير على الشعراء
وغيرة توصل لحد الكفر
عايز يكون دايما فى قلبك
ويردده لسانك كأنه الذكر
الشعر جن لو مسّ كاتب
يفوح منه كأنه أجمل عطر
يبكى ويتألم إذا نسيوه
ويرقص ويفرح بكلمة شكر
#شحاته_على_ابودرب
