احنا جيبنا اخرنا ومش عارفين نعيش
زيتنا مش في دقيقنا والاسعار بتزيد
الخواجة دولار بقي بعشرين جنيه
دا في فلم ميرامار كان بتنين جنيه
العيال جعانة ومش لاقي ااكلهم
وامهم زعلانة زهقت من عويلهم
الطماطم الكيلو بقت بتمانية جنيه
والرغيف الفينو سعره عالي ليه
عايز اجيب كنافة وشوية مكسرات
فتشت في جيوبي مالقيتش الجنيهات
عملت حساب بالبنك وبوليصة تامين
اخد عليهم فايدة قالولي اني مدين
عايزين عشر تلاف تمن فتح الحساب
وكمان سبعين الف ندهن بيها الابواب
اطلع من هدومي وانتوا خشوا فيها
انا حتنازل عنها شوفوا مين يشتريها
ياناس حرام عليكوا انا مش مليونير
اقرار الذمة المالي بيثبت اني فقير
الحكومة في وادي مش حاسين بالناس
ماترحمونا شوية وخلوا فيه احساس
يارب يامعين يانصير الغلابة
ارحمنا امين من فم الديابة
بقلم ✍️ علاء عبد الحميد
