أنا بنت التسعتاشر
أنا بنت التسعتاشر اللي تعبت من الطيبه عشان عنديه
يمكن الحلم كان كليه عسكريه
أو حتى هندسيه
بسمع موسيقى هاديه
يمكن انسى اللي فات
خلاص قلبي مات
قدمتلهم الحب من كل الجهات
قدمولي عذاب ومنستش اللي فات
قلبهم غشيم
وجعولي قلبي السليم
محدش مهتم بيا ، كلهم بيبصوا لشكلي..
محدش شايف روحي واللي جوايا ومشاكلي….
محدش بيقولي ازيك
مش شايفك طمنيني عنك
قدمتلهم كل الحب والحنان
محدش يوم حسسني بلأمان
فمشيت مشيت مليانه أحزان
طيب هو العيب كان فين…
انا قلبي شارد وحزين..
العجز كان فيا ولا كان فيهم…
دانا كنت دايماً احب أراضيهم…
صرخت بأعلى صوت
لأجل يسمعوا اني بموت
وقلبي تاه ملهوش بيت
والكل قال مليت
تعبت من بعدهم
عمري ما جربت جبرهم
خذلوني ولسه بحبهم
غشيم قلبي بيدور على ناس مش ليه..
انا بنت التسعتاشر…
مش طالبة غير قلب تسمعوني بيه…
مش طالبة غير تفهموني…
ونظرة عتابكوا من غير ما تخوفوني…
والأجمل إني افضل شفافه
مفيش حد مركز فتفاصيلي ولا حتي متشافه
الشعر والغزل والبحر
يقولوا اني في وهم
ومش بخير
الدعم الوحيد ليا جف فالسرد
وأنا عارفه اني صعيديه
في كل خطوة منسيه
النجاح والهيبه عندنا فالاكل والشرب
في قانون هنا لا يجوز للكل إلا للشب
تعالا نخرج تلاته باليل وعادي ما الكل برا
وانتي جهزي العشاء ابوكي هيوصل من برا
فاضل دقيقة وتيجي 5 المغرب ازاي تتأخري
الكل يقولي ممنوع الصوت يعلى أو تكتري
فالصعيد في قانون مفيش ظهور للبنات
والكاميرا تختفي مع اول ظهور بثبات
مفيش هنا اي حديت والكل مشغول
عن سيرة فلانه كانت وكانت
تشتغل ازاي وسط رجاله
وتتكلم وهو الراجل مشلول
وأهلها أزاي يخلوها تطول
والبنت ليها اي غير بيت جوزها
مفيش شغل ملهوش عازة…
مهو بكرة يجيلها عدلها…
وتتجوز اي جوازة..
والاب محبب ما عليه يسترها ويطمن عليها
من أبسط حقوق لينا بنتعاتب ومين فينا فاكر
إن الحياة دي حلوه وعادله يبقا فاجر
مفيش شغل فالبلد والكل بيهاجر
بقلم #آلاء_الزمزمي
